ესპანეთის სასამართლომ კატალონიაში განხორციელებულ ტერაქტებთან კავშირში ორ ეჭვმიტანილს წინასწარი პატიმრობა შეუფარდა.

საუბარია ესპანეთის მოქალაქეზე, 21 წლის მუჰამედ შემლალზე, რომელსაც ბრალი ედება ასაფეთქებელი მოწყობილობების დამზადებაში, და 27 წლის მაროკოელ დრის უკაბირზე, რომლის საბუთებით იყო ნაქირავები რამბლას ბულვარში ტერაქტისას გამოყენებული თეთრი ფურგონი.

მესამე ეჭვმიტანილი, მაროკოელი მუჰამედ აალია კამბრილსში ტერაქტის დროს გამოყენებული „აუდის“ მარკის ავტომობილის მფლობელია. ის პატიმრობიდან გაათავსუფლეს, თუმცა ესპანეთის დატოვება აუკრძალეს.

სასამართლოს ტერაქტებთან მისი კავშირის დასადასტურებლად საკმარისი მტკიცებულებები არ გააჩნია.

ამასთან, წინასწარი დაკავების იზოლატორში დატოვეს მეოთხე ეჭვმიტანილი, ასევე მაროკოელი სალჰ ალ-კარიბი. ის ქალაქ რიპოლის სატელეფონო პუნქტის მფლობელი.

ოთხივე ეჭვმიტანილი სასამართლოს წინაშე მადრიდში გუშინ წარდგა. El Mundo-ს ინფორმაციით, კატალონიაში მომხდარ თავდასხმებთან კავშირში ეჭვმიტანილმა მუჰამედ შემლალმა სასამართლოში აღიარა, რომ ტერორისტული დაჯგუფება ბარსელონაში საგრადა ფამილიას ტაძარში აფეთქების განხორციელებას გეგმავდა.

პოლიციის ინფორმაციით, კატალონიაში განხორციელებული თავდასხმების ორგანიზატორი 12-კაციანი ტერორისტული ჯგუფი იყო. მათი სავარაუდო ლიდერი, რიპოლის მეჩეთის იმამი ეს-სატი 16 აგვისტოს ქალაქ ალკანარში, ერთ-ერთ საცხოვრებელ სახლში მომხდარი აფეთქების დროს დაიღუპა. კიდევ ხუთი წევრი პოლიციამ კამბრილსში თავდასხმისას მოკლა. 21 აგვისტოს კი სამარტალდამცველებმა მოკლეს ბარსელონის ტერაქტის სავარაუდო შემსრულებელი, 22 წლის მაროკოელი იუნუ აბუიაქუბი.