სტიქიის ზონაში იმყოფება ჯანდაცვის მინისტრიც. მასშტაბური ხანძრის შედეგად წარმოქმნილი ძლიერი კვამლის გამო დავით სერგეენკო ბორჯომის ხეობაში მყოფ მოსახლეობას რეკომენდაციებით მიმართავს.
მინისტრი განსაკუთრებული სიფრთხილისკენ მცირეწლოვნებს, ფეხმძიმეებს, ხანდაზმულებს და სასუნთქი გზების ქრონიკული დაავადებების მქონე ადამიანებს მოუწოდებს და სთხოვს, რომ გარეთ გასვლას მოერიდონ და სახლებში დარჩნენ.
ჯანდაცვის მინისტრის განმარტებით, ჰაერში ნაცრის შემცველობა მაღალია, რის გამოც ხანძრის კერებთან ახლოს მცხოვრებ ოჯახებს პირბადეებს და რესპირატორებს ურიგებენ.
სტიქიური უბედურების ზონაში მცხოვრებ მოქალაქეებს რჩევებს აძლევენ ტოქსიკოლოგებიც. კვამლის გამო დღის განმავლობაში ხანძრის კერებთან ახლოს მდებარე დასახლებები ადგილობრივების და დამსვენებელების ნაწილმა უკვე დატოვა.