თბილისის მერობის კანდიდატი ალეკო ელისაშვილი თბილისის ზედამხედველობისა და გამწვანების სამსახურის ხელმძღვანელების პასუხისგებაში მიცემას მოითხოვს.
ელისაშვილის ინფორმაციით, საქმე ეხება თბილისის ზღვის ტერიტორიაზე კერძო კომპანიის ერთ ჰექტარამდე მიწის ნაკვეთის უკანონო შემოღობვას და გამოყენებას.
თბილისის მერობის დამოუკიდებელი კანდიდატის განცხადებით, ტერიტორია ერთი წლის წინ, კომპანია „შპს 2016“-მა თვითნებურად, ყოველგვარი საიჯარო ხელშეკრულებებისა და ბიუჯეტის სასარგებლოდ თანხის გადახდის გარეშე მიისაკუთრა და ადგილზე სასაწყობო მეურნეობას აწარმოებს.
მერობის კანდიდატის თქმით, მიუხედავად იმისა, რომ მერიის შესაბამისი სამსახურები საქმის კურსში არიან, ამ დრომდე საკითხით არც თბილისის ზედამხედველობის სამსახური და არც გამწვანების სამსახურის თანამშრომლები დაინტერესებულან.
ელისაშვილი თბილისის მერიის ზედამხედველობისა და გამწვანების სამსახურების მაღალჩინოსნებს ამ კომპანიის მფარველობაში ადანაშაულებს.
მისივე ინფორმაციით, კომპანია „შპს2016" გასული წლის აგვისტოში მას შემდეგ შეიქმნა, რაც თბილისის მერიამ გამწვანების ოთხი ტენდერი გამოაცხადა. როგორც ელისაშვილი ამბობს, ტენდერის გამოცხადებიდან ექვს დღეში დარეგისტრირებულმა კომპანიამ ოთხივე ტენდერი მოიგო. მათ მიერ დარგული 40 ათასი ხიდან, როგორც ელისაშვილი ამბობს, 10 ათასამდე გამხმარია, თუმცა მათი ჩანაცვლება ამ დრომდე არ მომხდარა.