ჯონ მაკკეინი, ოპერაციის შემდეგ, სენატში დაბრუნდება, რათა რუსეთის წინააღმდეგ სანქციების კანონპროექტს მხარი დაუჭიროს.
„სენატორი მაკკეინი მოუთმენლად ელის სენატში დაბრუნებას, რათა მნიშვნელოვანი კანონპროექტების კენჭისყრაში მიიღოს მონაწილეობა", - ეს განცხადება სენატორ მაკკეინის ვებგვერდზე გავრცელდა.
შეგახსნებთ, რამდენიმე დღის წინ ცნობილი გახდა, რომ ამერიკელ სენატორ ჯონ მაკკეინს ტვინის სიმსივნის დიაგნოზი დაუსვეს. საუბარია სიმსივნის მძიმე ფორმაზე. მაკკეინს მკურნალობის კურსი სხივურ თერაპიას და ქიმიოთერაპიას მოიცავს.
ჯონ მაკკეინი ამჟამად სენატის შეიარაღებული ძალების კომიტეტის თავმჯდომარის პოსტს იკავებს. 2008 წელს ის აშშ-ის პრეზიდენტად იყრიდა კენჭს. ვეტერანი სენატორი ცნობილია თავისი ხისტი და კრიტიკული პოზიციით რუსეთის მოქმედი ხელისუფლების მიმართ.