აღმაშენებლის გამზირზე გვიანობამდე იმყოფებოდნენ შინაგან საქმეთა სამინისტროს წარმომადგენლები. საავტომობილო მოძრაობას კი საპატრულო ეკიპაჟები აკონტროლებდნენ. აქციების დასრულების შემდეგ სატრანსპორტო მოძრაობა მალევე აღდგა.
აქცია აღმაშენებლის გამზირზე ქართველთა მარშის და ევროპული საქართველოს მხარდამჭერების დაპირისპირების ფონზე მიმდინარეობდა. განსხვავებული იდეით შეკრებილები ერთმანეთს დაუპირისპირდნენ.
ორი აქციის მონაწილეებმა ერთმანეთს ბოთლები, კვერცხები და სხვა საგნები ესროლეს. ინციდენტი მაშინ მოხდა, როდესაც ევროპული საქართველოს აქციის მონაწილეებმა აღმაშენებლის გამზირზე ჩაიარეს.
პატრიარქთან შეხვედრის შემდეგ ქართველთა მარშის ორგანიზატორებმა დაგეგმილი აქცია ჩაშლილად გამოაცხადეს, თუმცა მათი მხარდამჭერების ნაწილი აღმაშენებელზე მაინც დარჩა.
საპატრულო პოლიციამ დაპირისპირებულ მხარეებს შორის კორდონი შეკრა. აქციების დროს სამედიცინო დახმარება სამ ადამიანს დასჭირდა. მათგან ერთი აქციისა და კონტრაქციის წევრებს შორის მომხდარი დაპირისპირებისას დაშავდა, ხოლო მეორე შეუძლოდ გახდა.