მიხეილ ჯანელიძის ვიცე-პრემიერად დანიშვნა ხაზს გაუსვამს საგარეო პრიორიტეტების მნიშვნელობას საქართველოს მომავლის შენების საქმეში, - ამის შესახებ საქართველოს პრემიერ-მინისტრმა გიორგი კვირიკაშვილმა მთავრობის სხდომაზე განაცხადა.
როგორც გიორგი კვირიკაშვილმა აღნიშნა, ძალიან მნიშვნელოვანია, პრიორიტეტებში გამოიკვეთოს საქართველოს მთავრობის საგარეო მიმართულება.
„მიხეილ ჯანელიძემ ძალიან წარმატებული ნაბიჯები გადადგა. ვფიქრობთ, ვიზალიბერალიზაციის პროცესის წარმატებით დასრულება იყო ძალიან მნიშვნელოვანი და რა თქმა უნდა, ამ მიმართულებით ლომის წილი საგარეო საქმეთა სამინისტროს ჰქონდა. ასევე, მიხეილ ჯანელიძე, ეკონომიკის მინისტრის მოადგილის პოსტზე მუშაობისას, იყო მთავარი მომლაპარაკებელი საქართველოს მხრიდან ევროპასთან თავისუფალი სავაჭრო შეთანხმების გაფორმების პროცესში. ასე, რომ ვფიქრობთ, ეს ძალიან მნიშვნელოვანი გადაწყვეტილებაა და საგარეო მიმართულების პრიორიტეტებში აწევა იქნება ასევე ძალიან მნიშვნელოვანი ჩვენი ქვეყნის ევროპული და ევროატლანტიკური მისწრაფებების წარმატებით განსახორციელებლად“, - განაცხადა პრემიერ-მინისტრმა.
გიორგი კვირიკაშვილმა მიხეილ ჯანელიძე ვიცე-პრემიერად დღეს წარადგინა.