ბრალის დამტკიცების შემთხვევაში ფარმან ჯეირანლის 6-დან 9 წლამდე პატიმრობა ემუქრება. პროკურატურამ ის საქალაქო სასამართლოს განჩინების საფუძველზე დააკავა. საქმე კლინიკა „ლანცეტში“ ორი პაციენტისთვის ღვიძლის გადანერგვას ეხება.
ტრანსპლანტაციის შემდეგ ორივე მოქალაქე გარდაიცვალა. გამოძიების ინფორმაციით, რთული ქირურგიული ოპერაცია აზერბაიჯანიდან მოწვეულმა სპეციალისტმა ჩაატარა თუმცა მას არ ჰქონდა საექიმო სპეციალობაში საქართველოს სახელმწიფო სერტიფიკატი.
ოპერაციის ჩატარებამდე, შპს ,,ლანცეტის“ დირექტორი ვალდებული იყო პაციენტებისთვის, დონორების და მისი ოჯახის წევრებისთვის მიეწოდებინა ინფორმაცია იმ რისკების შესახებ, რაც ახლდა ღვიძლის გადანერგვას და ასევე მოეხდინა მათი წარდგენა ტრანსპლანტაციის საბჭოს წინაშე და თანხმობა აეღო ოპერაციის ჩატარებაზე, რაც მის მიერ არ იქნა შესრულებული. - აცხადებენ პროკურატურაში.
კლინიკა "ლანცეტის" დირექტორის გარდა გარდაცვლილი პაციენტის კარლო კეკელიძის მეუღლე სამედიცინო დაწესებულების მთავარი ექიმის ნინო კუზანოვასა და კლინიკის იურისტის პასუხისმგებლობასაც ითხოვს.
ნინო კუზანოვას განცხადებით, ორი პაციენტის გარდაცვალების გამო, მას პასუხისმგებლობა არ შეიძლება დაეკისროს ვინაიდან იგი არ ფლობდა ინფორმაციას არსებული მდგომარეობის შესახებ.