პარლამენტის ყოფილი თავმჯდომარე დავით უსუფაშვილი იმედს გამოთქვამს, რომ საკონსტიტუციო პროცესში ამ ეტაპზე მაინც, პირადად ჩაერთვება საპარლამენტო მმართველობის პირობებში ქვეყნის მთავარი პოლიტიკური ფიგურა - პრემიერ-მინისტრი. ამის შესახებ უსუფაშვილმა მედიასთან საკონსტიტუციო ცვლილებების თაობაზე გამართული შეხვედრის დროს აღნიშნა.
უსუფაშვილი აცხადებს, რომ საკონსტიტუციო ცვლილებების პროცესმა უნდა გაგვაერთიანოს და არ უნდა დაგვყოს.
„კონსტიტუციამ მრავალი ხელისუფლების მშვიდობიანი შეცვლა უნდა უზრუნველყოს და არა პირიქით - ყოველი ხელისუფლება ცვლიდეს კონსტიტუციას საზოგადოების მორიგი გახლეჩის ფონზე.
თუ პროცესი დღევანდელ პოლიტიკურ კალაპოტში გაგრძელდა, კვლავ მივიღებთ არსებული ხელისუფლების და არა ქვეყნის მომავლის კონსტიტუციას, რაც მორიგ ჯერზე დაასუსტებს ქვეყნის სამართლებრივ-პოლიტიკურ ფუნდამენტს და რასაც ნებისმიერი შემდეგი ხელისუფლება კვლავ ნაჯახით მიადგება.
ყველამ, ავტორებმაც და ოპონენტებმაც, აუცილებლად უნდა გამოვნახოთ საკუთარ თავში თუ საკუთარ გუნდებში დამატებითი რესურსი ერთმანეთისკენ ნაბიჯების გადასადგმელად და გონივრული კომპრომისების მისაღწევად.
იმედს ვიტოვებ, რომ საკონსტიტუციო პროცესში ამ ეტაპზე მაინც პირადად ჩაერთვება საპარლამენტო მმართველობის პირობებში ქვეყნის მთავარი პოლიტიკური ფიგურა - პრემიერ-მინისტრი, რომელიც მხოლოდ მმართველი უმრავლესობის ლიდერი არ არის და რომელსაც განსაკუთრებული პასუხისმგებლობა მხოლოდ აწმყოზე არ აკისრია“, - აცხადებს უსუფაშვილი.
უსუფაშვილი მისი კონკრეტული შეთავაზების შესახებაც საუბრობს.
„ჩემი შეთავაზებაა: 1. საკონსტიტუციო კომისიის მიერ შემუშავებული კონსტიტუციის ახალი ტექსტი პარლამენტში კენჭისყრაზე არ დადგეს საშემოდგომო სესიამდე იურიდიულ კომიტეტში მისი დახვეწის გარეშე.
საპარლამენტო არჩევნების საკითხში დავუბრუნდეთ „ქართული ოცნების“ მიერ 2015 წლის ივნისში ინიცირებულ და კენჭისყრისთვის მომზადებულ პროპორციულ და სამართლიან საარჩევნო სისტემას.
საპრეზიდენტო არჩევნების პირდაპირი თუ არაპირდაპირი წესის თაობაზე საბოლოო გადაწყვეტილება მივანდოთ 2020 წელს არჩეულ პარლამენტს“, - აცხადებს უსუფაშვილი.
ამასთან, უსუფაშვილი უკეთ დასამუშავებელ საკითხებზეც ამახვილებს ყურადღებას.
„საკონსტიტუციო კომისიამ შემჭიდროებულ ვადებში დიდი მოცულობის სამუშაოები ჩაატარა და სამსჯავროზე გამოიტანა კონსტიტუციის პრაქტიკულად ახალი ტექსტი. მრავალ საინტერესო და საჭირო ცვლილებებთან ერთად შემოთავაზებულია ბევრი ისეთი ნოვაცია, რომლის ნაჩქარევად, საფუძვლიანი გააზრებისა და დახვეწის გარეშე მიღება ბევრ პრობლემას შექმნის მომავალში.