ელისო კილაძემ თბილისის პოლიციის მთავარ სამმართველოსთან შვილის დავით ხარშილაძის დაკავება გააპროტესტა. მასთან ერთად მისი მეგობრები და ოჯახის წევრები იმყოფებოდნენ.

გაზეთ “ქრონიკა პლუსის” რედაქტორის განცხადებით, პოლიციამ მისი შვილი უკანონოდ დააკავა და ნარკოტიკული ნივთიერება ჩაუდო.

კილაძე შვილის დაკავებას მის ჟურნალისტურ საქმიანობას უკავშირებს. ჟურნალისტი, თანამოაზრეებთან ერთად, სამოქალაქო მოძრაობას ქმნის სახელწოდებით “არა ჩადებას”, შეიქმნება ასევე დედათა კომიტეტი, რომელიც პოლიციელების მხრიდან დაზარალებული პირების დაცვაზე იზრუნებს.

ადვოკატის განცხადებით, დაკავებულს ბრალი ჯერ წარდგენილი არ აქვს და საგამოძიებო უწყება მესამე ნარკოტესტის ჩატარებას ელოდება.