"იმედის დრო"-სთან ინტერვიუში საქალაქო სასამართლოს ყოფილმა თავმჯდომარემ მამუკა ახვლედიანმა მის მიმართ გამოთქმულ ბრალდებებზე ილაპარაკა და თქვა, რომ რამდენიმე თვის წინ გავრცელებული ნიკა გვარამიასა და მისი საუბრის აუდიოჩანაწერი ავთენტური არ არის.
"მე ნამდვილად არ მქონდა იმ პერიოდში მოსმენილი ჩანაწერი, როცა ინტერვიუებს ვიძლეოდი. ეს არის რაღაც ამოკრებილი მასალა, აბსოლუტურად ნაგლეჯ-ნაგლეჯ, ალბათ სხვადასხვა ადგილიდან... მსგავსი საუბარი ჩემთან არ შემდგარა არავითარ თანხაზე, არავითარ ფინანსურ უზრუნველყოფაზე მითუმეტეს ნიკა გვარამიასთან", - აცხადებს ახვლედიანი და დასძენს, რომ ნიკა გვარამიას მიერ ნახსენებ 6 მილიონთან მას კავშირი არ აქვს.
ახვლედიანი ამბობს ასევე რომ ქონება, რომელსაც ხელისუფლება მას სადავოდ უთვლის, ბანკიდან აღებული კრედიტით შეიძინა. შესაბამისი დოკუმენტაციის გამოქვეყნებას ის უახლოეს დღეებში აპირებს.
საქალაქო სასამართლოს ყოფილი თავმჯდომარე ცილისწამებისთვის სასამართლოში თეა წულუკიანის წინააღმდეგ სარჩელის შეტანასაც გეგმავს.
მამუკა ახვლედიანის და ნიკა გვარამიას აუდიოჩანაწერი, რომელიც 2016 წლის ოქტომბერში გავრცელდა, ხელახლა აქტუალური მას შემდეგ გახდა, რაც რამდენიმე დღის წინ რუსთავი-2 ის გენერალურმა დირექტორმა გვარამიამ თქვა, რომ ტელეკომპანიის საქმის მოსამართლეებზე ხელისუფლება ზეწოლას ახდენს.
2017 წლის 14 იანვარს, მოსამართლეებმა ბესარიონ ალავიძემ და პაატა ქათამაძემ პროკურატურას ყოფილი მაღალჩინოსნებისგან ზეწოლის ფაქტის გამოძიების თხოვნით მიმართეს.
ხელისუფლების წარმომადგენლებმა გვარამიას არგუმენტს არადამაჯერებელი უწოდეს და მოსამართლეებთან მისი ყოფილი თანაპარტიელების, "ნაციონალური მოძრაობის" ურთიერთობის პრაქტიკა შეახსენეს, ასევე აუდიოჩანაწერები, რომელიც შარშან შემოდგომაზე გავრცელდა და რომელშიც თითქოს ტელეკომპანიის დირექტორი გვარამია საქალაქო სასამართლოს თავმჯდომარეს ხმაურიანი გადადგომის სანაცვლოდ ფულად ანაზღაურებას სთავაზობს.
2016 წლის ოქტომბერში ნიკა გვარამიას და მამუკა ახვლედიანის საუბრის ორი აუდიოჩანაწერი გავრცელდა. მაშინ გვარამიამ განაცხადა, რომ ჩანაწერი თავად გააკეთა და ახვლედიანთან ლაპარაკის ფაქტი არ უარჰყვია. ტელეკომპანიის დირექტორთან შეხვედრა დაადასტურა ახვლედიანმაც, თუმცა ის ამბობდა, რომ საუბრის ზუსტ შინაარს ვერ იხსენებდა.
დღეს ახვლედიანიც და გვარამიაც აცხადებენ, რომ აუდიოჩანაწერები ფაბრიკაციაა, ის სუსის მიერ დამონტაჟებული და გავრცელებულია.
3 თებერვალს, "ქრონიკასთან" ინტერვიუში თეა წულუკიანმა ამ აუდიოჩანაწერებზე ლაპარაკისას განაცხადა "ჩვენ გვახსოვს როდესაც ჩანაწერები გამოქვეყნდა, ვიდრე მის ავთენტურობას თავად ავტორები დაადასტურებდნენ, გვარამია და მაშინ საქალაქო სასამართლოს თავმჯდომარე ახვლედიანი... იქ საუბარი იყო იმაზე, რომ თუ სკანდალით გადადგები მიიღებ ექვს მილიონ ლარს, დაადასტურეს თუ არა მათ რომ ეს საუბარი იყო ავთენტური?... ეს საუბარი ნამდვილად შედგა და ახვლედიანი არის "ნაციონალური მოძრაობის" მიერ სასამართლოს წინააღმდეგ დაგეგმილი კამპანიის ნაწილი", თქვა წულუკიანმა.
იუსტიციის სამინისტროში აცხადებენ, რომ ახვლედიანის სარჩელს მოგვიანებით გამოეხმაურებიან.