საქართველოს ჭაბუკ მოკრივეთა ნაკრებმა დიდ წარმატებას მიაღწია 15-24 მაისს უკრაინის ქალაქ ლვოვში გამართულ ევროპის ასაკობრივ ჩემპიონატზე. საქართველოს ასაკობრივი ნაკრების მოკრივეთა მონაგარი 1 ოქროს და 2 ბრინჯაოს მედალია.
საქართველოს ჭაბუკ მოკრივეთა ნაკრებმა 15-24 მაისს უკრაინის ქალაქ ლვოვში გამართულ ევროპის ასაკობრივ ჩემპიონატზე წარმატებას მიაღწია.
რამდენიმე წლიანი პაუზის შემდეგ, ამ ასაკობრივ კატეგორიაში ევროპის ჩემპიონის ტიტული მოიპოვა საქართველოს ნაკრების წევრმა – სახილ ალახვერდოვმა.46 კგ. წონით კატეგორიაში მოასპარეზე ჭაბუკმა მოკრივემ 4 მოწინააღმდეგე დაამარცხა, ფინალში კი რუმინეთის წარმომადგენელ სპორტსმენს სძლია.
ევროპის ჩემპიონატზე ბრინჯაოს პრიზიორები გახდნენ ბადრი ხუციშვილი (63 კგ) და არტიომ იორდანიანი (+80). სულ მედლებისათვის საქართველოს ჭაბუკთა ნაკრების 7 წევრი იბრძოდა.
საქართველოს ჭაბუკთა ნაკრები ლვოვიდან 24 მაისს დაბრუნდა. წარმატებულ მოკრივეებს თბილისის საერთაშორისო აეროპორტში სპორტისა და ახალგაზრდობის საქმეთა მინისტრის მოადგილე – შალვა გოგოლაძე, კრივის ფედერაციის წარმომადგენლები, გულშემატკივრები და ჟურნალისტები დახვდნენ.