მარტოკაცი ანდაქიდან - ერთი ბილიკა გვინდა, გზას ხომ არ ვითხოვთ

Mtisambebi.ge - 15 წელია მუცოში საზღვარს ამაგრებს. ანდაქში დაიბადა და გაიზარდა. შემდეგ იყო იძულებითი გადასახლება სოფელ გამარჯვებაში, ნახევრად უდაბნოში ცხოვრება და უკან დაბრუნების სირთულე. დაოჯახებულია, თუმცა მეუღლესა და შვილებს ზაფხულობით თუ ნახულობს - ზამთარში, როცა ტემპერატურა -18, -20 გრადუსამდე ეცემა და დათვიჯვრის უღელტეხილზე თოვლის სიმაღლე 4-5 მეტრს აღწევს, მისვლა-მოსვლა პრაქტიკულად შეუძლებელია. ამ პერიოდში გადაადგილების ერთადერთი საშუალება სასაზღვრო პოლიციის ვერტმფრენია. სოფელში ხევსურეთის სიყვარულმა და საქმის კეთების სურვილმა დააბრუნა, საქმის, რომელსაც უამრავი მოუგვარებელი პრობლემა აფერხებს.