როდის მიმართავს უმრავლესობა პრეზიდენტს რიგგარეშე სესიის დანიშვნის მოთხოვნით და დაძლევს თუ არა ვეტოს, მომავალ კვირას გაირკვევა.
პრეზიდენტის მოტივირებული შენიშვნები პარლამენტშია. წინასწარი ინფორმაციით, ირაკლი კობახიძე პრეზიდენტს სხდომის დანიშვნის წინადადებით ორშაბათს მიმართავს და, სავარაუდოდ, რიგგარეშე სხდომის თარიღად 26 ივლისი დასახელდება,
სწორედ რიგგარეშე სხდომაზე გაირკვევა, პარლამენტი გაიზიარებს პრეზიდენტის მოტივირებულ შენიშვნებს, თუ დაძლევს ვეეტოს.
პრეზიდენტმა პარლამენტს მოტივირებული შენიშვნები გუშინ საღამოს გადაუგზავნა, ეს არის სამი საკმაოდ ვრცელი დოკუმენტი, სადაც ვრცლად არის საუბარი იმ არგუმენტებზე, რის გამოც გიორგი მარგველაშვილმა თვითმმართველობისა და საარჩევნო კოდექსებს ვეტო დაადო.
გიორგი მარგველაშვილი პროექტებში დემოკრატიული პროცესის დასუსტების საფრთხეს ხედავს. შენიშვნებში პრეზიდენტი მმართველ პარტიას ვენეციის კომისიის იმ რეკომენდაციასაც ახსენებს, რომლის მიხედვითაც, არჩევნების წინ საარჩევნო და თვითმმართველობის კანონების შეცვლა მიზანშეწონილი არ არის.