ბათუმის 11-12 მარტის მოვლენების საქმეზე დაკავებული მერაბ ღოღობერიძისა და ირაკლი ჩხვირკიას სასამართლო პროცესი 24 ივლისს განახლდება.

დღეს მოსამართლემ ბრალდების მიერ წარმოდგენილი მტკიცებულებები მოისმინა, მათ შორის, საქმის გამომძიებლების ჩვენებები.

მოსამართლე დავით მამისეიშვილმა არ დააკმაყოფილა ჩხვირკიას ადვოკატის შუამდგომლობა, დასაშვებად არ ცნო ერთ-ერთი დაკავებულის მერაბ მურვანიძის ჩვენება, რომელიც მან ჩხვირკიას წინააღმდეგ მისცა. დაცვის მხარე ირწმუნებოდა, რომ მურვანიძემ საპროცესო შეთანხმების სანაცვლოდ მისცა ჩვენება.

მერაბ მურვანიძეს და კიდევ რვა პირს საპროცესო შეთანხმება გუშინდელ სხდომაზე გაუფორმეს.

ამჟამად პროკურატურამ 20 დაკავებული პირიდან შეთანხმება 11-თან მიაღწია. შესაძლებელია, საპროცესო სხვა დაკავებულებთანაც გაფორმდეს, მერაბ ღოღობერიძისა და ირაკლი ჩხვირკიას გარდა. მათთვის პროკურატურას შეთანხმება არ შეუთავაზებია.