„ბრიტანეთის ავიახაზები“ „ჰითროუსა“ და „გათვიკის“ საერთაშორისო აეროპორტებიდან რეისებს დღეს განაახლებს, - ამის შესახებ ინფორმაციას BBC ავრცელებს.
მედიასაშუალების ცნობით, ავიაკომპანია შაბათს მწყობრიდან გამოსული კომპიუტერული სისტემის გამო, იძულებული გახდა დაგეგმილი რეისები გაეუქმებინა, რის გამოც „ბრიტანეთის ავიახაზების“ ფრენები შეწყდა, არა მხოლოდ ლონდონში, არამედ მსოფლიოს სხვადასხვა აეროპორტში.
ავიაკომპანია მგზავრებს შექმნილი დისკომფორტისთვის ბოდიშს უხდის და 10 ივნისამდე ნებისმიერ რეისზე ბილეთის გადაცვლის შესაძლებლობას სთავაზობს, მათ შორის იმ მგზავრებსაც, რომლებიც უკვე აღდგენილი რეისით გამგზავრებას გადაიფიქრებენ.
იმ პირებს, ვინც 27 მაისის რეისით გაფრენა ვერ შეძლეს, ავიაკომპანია საშუალებას აძლევს, ნოემბრამდე ნებისმიერი რეისი აირჩიონ.
„ბრიტანეთის ავიახაზების“ წარმომადგენლობის განცხადებით, კომპიუტერული სისტემის გაუმართაობა ტექნიკური მიზეზებით იყო გამოწვეული და კიბერთავდასხმასთან კავშირი არ აქვს.